نئیدہلی۔: عوامی شکایات اور پنشن کے وزیر مملکت ڈاکٹر جتیندر سنگھ نے خواہش ظاہر کی تھی کہ عملے ، عوامی شکایات اور پنشن سے متعلق وزارت کے انتظامی اصلاحات اور عوامی شکایات کے محکمے (ڈی اے آر پی جی) کے سرکاری وفد سری نگر کا دورہ کریں تاکہ مرکز کے زیر انتظام علاقوں جموں وکشمیر اور لداخ کیلئے اس محکمے کی پہل قدمی کے بارے میں تبادلہ خیال کیا جاسکے اور آگے کے نقشہ راہ کو مستحکم بنایا جاسکے۔
اس کے نتیجے میں ڈی اے آر پی جی کے ایڈیشنل سکریٹری جناب وی شرینواس کی قیادت میں ڈی اے آر پی جی کے ایک وفد نے 5-4 ستمبر 2019 کو جموں وکشمیر کا دورہ کیا۔ دوسرا دورہ 21-20 ستمبر 2019 کو ڈی اے آر پی جی کے جوائنٹ سکریٹری جناب ششانک شیکھر کی قیادت میں ایک ٹیم نے کیا۔ اس سلسلے کو جاری رکھتے ہوئے جموں وکشمیر کا دورہ ایک اور ٹیم نے 15 اور 16 اکتوبر 2019 کو ڈی اے آر پی جی کے جوائنٹ سکریٹری جناب وی ششانک کی قیادت میں کیا۔
جس ٹیم نے 15 اور16 اکتوبر 2019 کو جموں وکشمیر کا دورہ کیا تھا اس نے جموں وکشمیر کی پوری حکومت میں ای۔ آفس پر عمل درآمد، صلاحیت سازی / جموں وکشمیر کے افسران کی تربیت اور قدرتی آفات کے بندوبست کے بارے میں کانفرنس کے تعلق سے تفصیلی تبادلہ خیال کیا۔ ٹیم نے عوامی شکایات کو سننے کے عمل میں بھی شرکت کی جو 16 اکتوبر2019 کو منعقد کیا گیا اور جس کی نظامت گورنر کے مشیر جناب کے کے شرما نے کی۔ اس میں جموں وکشمیر میں موجود عوامی شکایات سے نمٹنے کے طریقہ کار کو دیکھا گیا جس میں مشیر صاحبان عام آدمی کی شکایات کو ذاتی طور پر سنتے ہیں اور ان کے مسائل حل کرنے کی کوشش کرتے ہیں۔
ٹیم نے جموں وکشمیر کی حکومت سے یہ درخواست بھی کی کہ وہ وزیراعظم کے ایوارڈ کیلئے اختراعی نوعیت کے زمروں کے تحت حاصل شدہ 11 درخواستوں پر مبنی کامیابیوں کی کہانیوں کے بارے میں تفصیلی جائزے تیا رکریں تاکہ کم از کم حکومت اور زیادہ سے زیادہ حکمرانی (ایم جی ایم جی) کے سلسلے میں ایک خصوصی شمارہ تیزی کے ساتھ منظر عام پر لایا جاسکے۔
ٹیم نے گورنر کے مشیروں جناب کے، سکندن اور جنا ب وجئے کمار سے بھی ملاقا ت کی نیز اطلاعاتی ٹیکنالوجی کے محکمے کے پرنسپل سکریٹری ، آر ڈی کے سکریٹری اور جموں وکشمیر کے آرٹ اور کلچر کے سکریٹری سے ملاقات کی۔ انہوں نے جموں و کشمیر کے بارے میں مختلف اقدامات پر جو ڈی اے آر پی جی کے ذریعے کیے جانے ہیں ، تفصیلی تبادلہ خیال کیا۔ اس بات پر بھی بات چیت کی گئی کہ جموں وکشمیر کے قیمتی کلچر اور ورثے کے بارے میں مختصر فلمیں / ویڈیوز تیار کرنے پر غور کیا جائے۔ قدرتی آفات کے بندوبست کے بارے میں ایک دو روزہ کانفرنس 30 نومبر 2019 کو جموں میں کی جائے گی۔
