نئی دہلی، شمال مشرق کو جلد ہی ملک کی پہلی ایئر ڈسپنسری ملے گی جو کہ ایک ہیلی کاپٹر میں بنائی گئی ہوگی اور شمال مشرق کی ترقی (ڈی او این ای آر) کی مرکزی وزارت ا س اقدام کے لئے ابتدائی فنڈنگ کے طور پر 25 کروڑ روپے دے چکی ہے۔
کل شہری ہوائی بازی کے شعبے اور ہیلی کاپٹر سروس /پون ہنس کے نمائندوں کے ساتھ ایک میٹنگ کے بعد شمال مشرقی خطے کی ترقی (ڈی او این ای آر) کےمرکزی وزیر مملکت (آزادنہ چارج)، وزیراعظم کے دفتر ، عملہ ، عوامی شکایات ، پنشن ، جوہری توانائی اور خلا کے وزیر مملکت ڈاکٹر جتیندر سنگھ نے کہا کہ چند مہینے قبل سے ہی شمال مشرقی خطے کی ترقی کی وزارت ایسے دور دراز علاقو ں میں جہاں کوئی ڈاکٹر یا طبی سہولت فراہم نہیں ہے اور ضرورت مند مریضوں کی رسائی کسی طرح کی طبی سہولت تک نہیں ہے، ہیلی کاپٹر پر مبنی ڈسپنسری / او پی ڈی خدمات دستیاب کرانے کے امکانات کی تلاش کرتی آرہی ہے۔ انہوں نے کہاکہ شمال مشرقی خطے کی ترقی کی وزارت کے ذریعہ پیش کی گئی اس تجویز کو منظور کرلیا گیا ہے اور شہری ہوائی بازی کی وزارت میں یہ کام آخری مراحل میں ہے۔
ڈاکٹر جتیندر سنگھ نے کہا کہ شمال مشرقی خطے کی ترقی کی وزارت اس تجویز پر پوری توجہ کے ساتھ کام کررہی ہے تاکہ 2018 کے آغاز میں شمال مشرق کے لوگوں کو مرکزی حکومت کی جانب سے یہ ایک تحفہ مل سکے ۔
ڈاکٹر جتیندر سنگھ نے انکشاف کیا کہ آج بھی ہندستان کی تقریباً ایک تہائی آبادی کی رسائی بستروں والے اسپتالوں تک نہیں ہے جس کا نتیجہ یہ ہے کہ دور دراز کے علاقوں میں رہنے والے غریب مریض اہم طبی سہولتوں سے محروم رہ جاتے ہیں۔ شمال مشرقی خطے کی ترقی کی وزارت کی ایما پر شمال مشرق میں جس تجربے کو متعارف کرایا جارہا ہے اسے جمو ں و کشمیر اور ہماچل پردیش جیسی پہاڑی اور دشوار گزار راہوں والی ریاستوں تک وسعت دی جائے گی۔
ڈاکٹر جتیندر سنگھ نے کہا کہ موجودہ منصوبہ کے تحت ابتدا میں طبی سہولتوں سے لیس ہیلی کاپٹر دو مقامات منی پور کےامپھال اور میگھالیہ کے شیلانگ میں موجود رہیں گے۔ انہوں نے کہا کہ مذکورہ دونوں شہروں میں اعلی معیار کے پوسٹ گریجویٹ میڈیکل ادارے ہیں جہاں کے اسپیشلسٹ ڈاکٹر ضروری سازوسامان اور پیرا میڈیکل اسٹاف کے ساتھ ہیلی کاپٹروں سے نقل و حمل کریں گے اور شمال مشرقی خطے کی آٹھ ریاستوں کے مختلف مقامات پر ڈسپنسری / او پی ڈی کا اہتمام کریں گے۔ انہوں نے کہا کہ واپسی کے وقت متعلقہ ہیلی کاپٹر ایسے مریضوں کو لے کر آسکیں گے جنہیں شہر کے کسی اسپتال میں داخل کرائے جانے کی ضرورت ہوگی۔ شمال مشرق کے لئے دیگر نئے ہیلی کاپٹر خدمات منصوبوں کا ذکر کرتے ہوئے ڈاکٹر جتیندر سنگھ نے کہا کہ امپھال، گوہاٹی اور ڈبرو گڑھ کے قر ب و جوار کے خطے میں ابتدائی مرحلے میں چھ روٹوں پر دو انجن والے ہیلی کاپٹروں کی تعیناتی کا منصوبہ ہے۔
