نئیدہلی، الیومنیم بنانے والی مرکزی پبلک سیکٹر کے شعبے کی نورتن کمپنی نیشنل ایلیومنیم کمپنی لمٹیڈ (این اے ایل سی او ) نے حکومت ہند کی کانکنی کی وزارت کے ساتھ ایک مفاہمت نامے پر دستخط کرکے مالی سال 19-2018 کے لئے اپنے کام سے 9350 کروڑروپے کی آمدنی کا سب سے بڑا نشانہ معین کیا ہے ، جو پچھلے سال کے مقابلے پندرہ فیصد زائد ہے ۔اس مفاہمت نامے پر حکومت ہند کی کانکنی کے امور کی وزارت کےسکریٹری جناب انل گوپی شنکر مقیم اور نالکو کے چیف منیجنگ ڈائریکٹر جناب تپن کمار چاند نے پچھلی شام نئی دلی میں دستخط کئے ۔ اس موقع پر جناب مقیم نے نالکو کی انتظامیہ کو کمپنی کی بہترین کارکردگی اور 18-2017 میں کارپوریٹ انتظامیہ کے بہترین معیارات نیز 19-2018 کے لئے ٹھوس اور مضبوط کاروباری منصوبے تیار کرنے پر مبارکباددی ۔یہ مفاہمت نامہ ڈپارٹمنٹ آف پبلک انٹر پرائزز کے رہنما اصولوں کے مطابق کیا گیا ہے اوراسے بین وزارتی کمیٹی اورکانکنی کے امور کی وزارت ،دونوں کے ساتھ گفتگو کے بعد اس مفاہمت نامے کو قطعی شکل دی گئی ہے ۔
اس مفاہمت نامے میں اہلیت کے صد فیصد استعمال کے ساتھ 2.1 ملین ٹن ایلیومینا کی پیداوار کا نشانہ معین کیا ہے جبکہ 4.15 لاکھ ٹن ایلیومنیم کی پیداوار کا نشانہ مقررکیا گیا ہے ۔اس کے ساتھ ہی اس مفاہمت نامے نے پیداوار ی صلاحیت میں بہتری کے جزو کی حیثیت سے کاربن کی کھپت میں بھی تخفیف کا نشانہ معین کیا ہے ۔ علاوہ ازیں اس میں تحقیق وترقی کی نئی مصنوعات کو کاروباری بنائے جانے پر بھی زوردیا گیا ہے۔
