نئی دہلی، بحریہ کے سربراہ ایڈمرل سنیل لامبا پی وی ایس ایم ،اے وی ایس ایم ،اے ڈی سی نے آج ڈائریکٹریٹ آف نیول ڈیزائن ( سرفیس شپ گروپ) میں پہلے ورچوئل ریالیٹی سینٹر (وی آر سی) کا افتتاح کیا۔ یہ مرکز ہندستانی بحریہ کی اندرون ملک جنگی جہازوں کا ڈیزائن تیار کرنے کی صلاحیتوں میں زبردست اضافہ کرے گا۔ اس کے علاوہ یہ مرکز ‘‘میک ان انڈیا’’ پروگرام کے تحت جنگی جہازوں کی تعمیر میں زبردست امداد دے گا اور خود کفالت میں اضافہ کرے گا۔
افتتاحی تقریب میں اپنی تقریر کے دوران ایڈمرل لامبا نے ڈیزائن کا تصور پیش کرنے اور اس پروجیکٹ کو بروئے کار لانے کے سلسلہ میں ڈائریکٹوریٹ کی انتھک کوششوں ، وسیع النظری اور اقدامات کی تعریف کی۔ اس پروجیکٹ سے ڈیزائن تیار کرنے والوں اور اسے استعمال کرنے والوں کے درمیان مسلسل رابطے اور تال میل کی سہولت حاصل ہوگی جس سے جنگی جہازوں کے ڈیزائن وغیرہ بنانے میں مدد ملے گی۔
ڈائریکٹریٹ آف نیول ڈیزائن (سرفیس شپ گروپ) نے 1960 کی دہائی میں اپنے کام کا آغاز کیا تھا اور اس وقت سے اب تک اس نے ہندستانی بحریہ کی جنگی جہاز کی ڈیزائن سازی اور تعمیر کی صلاحیتوں میں اضافہ کے معاملے میں ایک بڑ ارول ادا کیا۔
ہمہ مقصدی ٹیم نے بڑی کامیابی کے ساتھ 19 جنگی جہازوں کے ڈیزائن تیار کئے ہیں جن پر اب تک 90 پلیٹ فارم سے زیادہ تعمیر کئے جاچکے ہیں۔
