نئی دہلی،؍اپریل،نائب صدرجمہورہ محمد حامد انصاری نے کہا ہے کہ جمہوریت میں کمیوں اور جمہوریت کی ناکامی کا حل تلاش کرنا ہی دراصل زیادہ جمہوریت ہے۔ نائب صدر آج پولینڈ کی ورسا یونیورسٹی میں ’’ہندوستانی جمہوریت کی 7 دہائیاں‘‘ کے موضوع پر لیکچر دے رہے تھے۔ اس موقع پر انتہائی چھوٹی، چھوٹی اور درمیانہ صنعتوں کے وزیر مملکت جناب گری راج سنگھ، ورسا یونیورسٹی کے صدر (ریکٹر) پروفیسر مارسن پالسی اور دیگر اہم شخصیات موجود تھیں۔
نائب صدر جمہوریہ نے اپنی تقریر میں کہا کہ ہماری مستقبل میں جمہوریت کیلئے ہندوستان کے عوام بہترین گارنٹی ہیں۔ انہوں نے کہا کہ جب تک ایک عام ہندوستانی جمہوریت اور ثقافتی رواجوں کی قدر کو تھامے رہے گا، جب تک ہمارے عوام اپنے حقوق پردست درازی کا مقابلہ کریں گے اور فرقہ پرست اور فرقہ وارانہ طاقتوں کے آگے زیر نہیں ہوں گے، تب تک امید ہے کہ ہماری جمہوریت دوسروں کے لئے باعث ترغیب اور حوصلہ افزا ء رہے گی۔
