نئی دلّی ، ڈبہ بند خوراک کی صنعتوں کی مرکزی وزیر محترمہ ہرسمرت کور بادل نے آج یہاں فارمر پروڈیوسر آرگنائزیشن اور کاشت کاروں سمیت تمام شراکت داروں کے ساتھ میٹنگ کی تاکہ آپریشن گرینز کے طریقۂ کار پر ان کی تشویشات اور تجاویز حاصل کی جا سکیں ۔ بڑے شراکت داروں مثلاً ایف پی اوز کی نمائندگی کرنے والے تقریباً 100 شرکاء ریاستی حکومتوں ، نبارڈ ، ایس ایف اے سی کے اعلیٰ عہدیداران اور انڈسٹری ایسوسی ایشن نے اس مشاورتی میٹنگ میں شرکت کی ۔
ملک کے متعدد علاقوں سے آئے شراکت داروں کو پردھان منتری کسان سمپدا یوجنا اور آپریشن گرینز کے فوائد سے متعلق خطاب کرتے ہوئے محترمہ ہرسمرت کور بادل نے ملک میں کسانوں کی بہتری اور 2022 ء تک ان کی آمدنی کو دوگنی کرنے کے ضمن میں ان اقدامات کے فائدوں کو اجاگر کیا ۔
محترمہ بادل نے حکومت کے ذریعہ کئے گئے حالیہ اقدامات اور خوراک کی ڈبہ بندی سے متعلق بجٹ اعلانات کو اجاگر کیا تاکہ ملک میں خوراک کی ڈبہ بندی کو فروغ دیا جا سکے اور کسانوں کی آمدنی میں اضافہ کرکے انہیں امداد فراہم کی جا سکے ۔ محترمہ بادل نے میٹنگ کے شرکاء سے زمینی حقیقتوں کی بنیاد پر آپریشن گرینز کے نفاذ کے لئے رہنما خطوط وضع کرنے کے لئے تجاویز طلب کیں ۔ محترمہ بادل نے کسانوں اور ایف پی اوز کے مسائل اور ان مسائل کے حل کرنے سے متعلق تجاویز کو بغور سنا ۔
ڈبہ بند خوراک کی صنعتوں کی وزیر مملکت سادھوی نرنجن جیوتی نے آپریشن گرینز سے متعلق شراکت داروں کو خطاب کرتے ہوئے کہا کہ کسان بدستور سرکار کی اصل توجہ ہیں ۔ انہوں نے اس موقع پر موجود شراکت داروں کو ‘‘ بیک ورڈ – فارورڈ ر ’’ رابطوں کی تشکیل کی اسکیم اور نویش بندھو اسکیم کے بارے میں جانکاری دی ۔ ملک کے مختلف حصوں سے آئے شرکاء نے سپلائی چین کے موجودہ مسائل سے متعلق اپنا فیڈبیک دیا اور ان مسائل کو حل کرنے کے لئے اپنی تجاویز پیش کیں ۔
اس موقع پر ڈبہ بند خوراک کی صنعتوں کی وزارت کے سکریٹری جناب جے پی مینا کے علاوہ وزارت کے سینئر افسران اور دیگر معززین موجود تھے ۔
پس منظر :
حال ہی میں وزیر خزانہ نے اپنی بجٹ تقریر میں ‘‘ آپریشن فلڈ ’’ کی طرز پر ‘‘ آپریشن گرینز ’’ کا اعلان کیا تھا تاکہ فارمر پروڈیوسر آرگنائزیشن ( ایف پی اوز ) ، ایگری – لاجسٹکس ، خوراک کی ڈبہ بندی کی سہولتوں اور پیشہ ورانہ مینجمنٹ کو فروغ دیا جا سکے ۔ اس کے لئے 500 کروڑ روپئے مختص کئے گئے ہیں ۔
