نئی دہلی، نائب صدر جمہوریہ ہند جناب ایم وینکیا نائیڈو آج سول سوسائٹی، غیر سرکاری تنظیموں اور تجارتی گھرانوں سے اپیل کی کہ وہ ملک کی سوء تغذیہ کے خاتمے کے لئے حکومت کی کوششوں میں اپنا تعاون دیں۔
تشویش کا اظہار کرتے ہوئے نائب صدر جمہوریہ نے کہا کہ گزشتہ سات دہائیوں میں مختلف شعبہ حیات میں ملک کے ذریعہ قابل ذکر پیش رفت کے باوجود سوء تغذیہ ایک بڑا چیلنج بنا ہوا ہے۔ انہوں نے مزید کہا کہ یہ افسوس ناک ہے کہ ہمارے پانچ سال سے کم عمر کے بچوں کا 35.7 فی صد مطلوبہ وزن سے کم وزن کا ہے اور 38.4 فی صد ایسے بچے کمزور ہیں۔
آج بنگلورو میں ادمیہ چیتنا کا دورہ کرنے کے بعد حاضرین سے خطاب کرتے ہوئے نائب صدر جمہوریہ نے ایسے متعدد مطالعات کی طرف اشارہ کیا جس میں یہ دکھایا گیا ہے کہ بچوں کی تغذیاتی صورتحال کا مضبوط تعلق ان کی تعلیمی کارکردگی سے ہے۔
انہوں نے مزید کہا کہ غذائیت سے بھرپور خوراک کے فقدان کا نتیجہ دماغ کی کمزور نشوونما سیکھنے کی صلاحیت میں کمزوری ، قوت مدافعت کی کمی اور انفیکشن سے متاثر ہونے کے زیادہ اندیشے کی شکل میں برآمد ہوسکتا ہے۔
جناب نائیڈو نے کہا کہ سوء تغذیہ کے سبب غریبی کا ایک بدنما دائرہ بنتا ہے اور اقتصادی ترقی کو متاثر کرتا ہے۔ انہوں نے زور دے کر کہا کہ بچوں اور نوجوانوں کے صحت مند فروغ کے لئے ایسے منظر نامے سے بچنے کی خاطر فوری اقدامات کئے جانے چاہئیں۔
کم نقل و حرکت والی طرز زندگی اور خوردونوش کی غیر صحت مند عادتوں کے سبب غیر متعدی امراض کے بڑھتے ہوئے واقعات کا حوالہ دیتے ہوئے نائب صد رجمہوریہ نے جنک فوڈ سے بچنے اور جسمانی فٹنیس کو برقرار رکھنے کی ضرورت کے سبب نوجوانوں کے درمیان بیداری پیدا کرنے کی اپیل کی۔
نائب صدر جمہوریہ نے بنگلورو ، ہبالی، کلبورگی اور راجستھان کے جودھپور میں واقع چار باروچی خانوں سے روزانہ تقریباً ڈیڑھ لاکھ بچوں کو کھانا دستیاب کرانے کے لئے آنجہانی اننت کمار اور ان کی اہلیہ محترمہ تیجسوینی اننت کمار کے ذریعہ قائم کئے گئے ادمیہ چیتنا کی ستائش کی۔
مشترک کرنے اور دیکھ بھال کرنے کی صدیوں پرانی ہندستانی اقدار کو مجسم شکل دینے کے لئے جناب نائیڈو نے اس تنظیم کی ستائش کی۔ انہوں نے کہا کہ حکومت کے ذریعہ چلایا جارہا پوشن ابھیان یا قومی غذائی مشن ملک بھر میں تغذیاتی اشاریہ جات بہتر بنانے میں اہم رول ادا کررہا ہے۔
اس سے قبل نائب صدر جمہوریہ نے کیمپس جانے ، کھانے کی تیاری میں مصروف متعدد مراکز کا دورہ کیا ۔ انہوں نے انا پورنا کچن کو کچرے اور حیاتیاتی ایندھن سے مکمل طور پر پاک کچن بنانے کے لئے انتظامیہ ، ورکروں اور رضاکاروں کی عزت افزائی کی۔
جناب نائیڈو نے کہا کہ اپنی توانائی سے متعلق ضرورتوں کی تکمیل بائیو ماس اور شمسی توانائی کرنے کا اس تنظیم کا طریقہ کار دوسروں کے لئے قابل تقلید ہے۔ اس تناظر میں جناب نائیڈو نے کہا کہ سبھی شعبوں میں ایک لیڈر شپ انسٹی ٹیوٹ کے توسط سے نئے قائدین کو تیار کرنے اور ان کی سرپرستی کرنے کے لئے اننت کمار پرتشٹھان کے ذریعہ کی گئی شروعات خیر مقدم کے لائق ایک قدم ہے۔ انہوں نے کہا کہ یہ صحت دیکھ بھال اور سبز طرز حیات کی سمت میں کام کرنے کے لئے بھی قدم بڑھائے گا۔ یہ دونوں ایسے شعبے ہیں جن میں اننت کمار جی کی زبردست دلچسپی تھی۔
اس موقع پر سابق مرکزی وزیر آنجہانی اننت کمار کے ساتھ اپنے قریبی تعلقات کو یاد کرتے ہوئے جناب نائیڈو نے کہا کہ میں نے جناب اننت کمارکی شکل میں نہ صرف اپنا ایک عزیز دوست کھودیا ہے بلکہ ہمارے ملک میں بھی ایک سچے رہنما کو گنوا دیا ہے۔ یہ اشد ضروری ہے کہ ہم ان کے آئیڈیلز ، اقدار اور کاموں کو جاری رکھیں۔
کرناٹک کے نائب وزیراعلی جناب سی این اشوت نارائن ، بنگلورو جنوب سے ممبر پارلیمنٹ جناب تیجسوی سوریہ ، ادمیہ چیتنا کے منیجنگ ٹرسٹی اور چیئرپرسن ڈاکٹر تیجسوینی اننت کمار اور اس تنظیم سے وابستہ دیگر افراد اس تقریب میں موجود تھے۔
