نئی دہلی، نائب صدر جمہوریۂ ہند جناب ایم وینکیا نائیڈو نے کہا ہے کہ نیشنل میوزیم میں رکھے گئے فن پاروں سے تاریخ میں دلچسپی رکھنے والوں ، فنونِ لطیفہ سے محبت کرنے والوں کو ایک بڑا موقع یہ ملتا ہے کہ اِن سے ہندوستان کے ماضی اور درخشاں حالات کو سمجھنے میں مدد ملتی ہے ۔ انہوں نے مزید کہا کہ اس نمائش سے ہندوستان کے دستکاروں کی مہارات کی عکاسی ہوتی ہے ۔ یہاں موجود چیزیں ہندوستان میں جواہرات سازی کی ایک بہترین مثال ہیں ۔ جس فن میں اس نے ماضی میں مہارت حاصل کی تھی ۔
وہ نیشنل میوزیم کے اہلکاروں کے ساتھ بات چیت کر رہے تھے ۔ انہوں نے آج یہاں نیشنل میوزیم میں خصوصی نمائش کا دورہ کیا ، جس کا موضوع تھا ، ‘‘ جویلس آف انڈیا : دی نظامس جویلری کلکشن ’’ ۔ نائب صدر جمہوریہ نے نظام کے ہیرے جواہرات کا سب سے بڑا اور سب سے قیمتی ذخیرہ دیکھا ۔ نائب صدر جمہوریہ کی اہلیہ محترمہ اوشا نائیڈو بھی اُن کے ہمراہ تھیں ۔
جناب نائیڈو نے کہا کہ انہیں یہ معلوم کرکے بہت خوشی ہوئی ہے کہ نیشنل میوزیم میں مختلف نوعیت کی اندازاً 200000 چیزیں ہیں ۔ ان کا تعلق ہندوستان اور بیرون ملک دونوں سے ہے ۔ اس ذخیرے سے قدیمی نادر چیزوں کا احاطہ کیا گیا ہے ، جس سے ہندوستان کے قیمتی ورثے کی عکاسی ہوتی ہے ۔ انہوں نے بے انتہا مہارت کے حامل 173 قیمتی جواہرات اور زیورات کو محفوظ رکھنے کے لئے نیشنل میوزیم اور ریزرو بینک آف انڈیا کی ستائش کی ۔
انہوں نے نیشنل میوزیم کے ڈائریکٹر جنرل ڈاکٹر بی آر منی اور حکومت ہند کی وزارت ثقافت کے اہلکاروں کی اس خصوصی نمائش کو منعقد کرنے کے لئے تعریف کی ۔
