نئی دہلی: وزیراعظم نریندر مودی نے آج ویڈیو کانفرنسنگ کے ذریعہ ملک بھر میں پردھان منتری آواس یوجنا کے مستفیدین کے ساتھ بات چیت کی ۔ حکومت کی متعدداسکیموں کے مستفیدین کے ساتھ ویڈیو کانفرنسنگ کے ذریعہ وزیراعظم کی بات چیت کی سیریز کے تحت یہ تیسری بات چیت ہے ۔
پردھان منتری آواس یوجنا کے مستفیدین کے ساتھ تبادلہ خیال پر اپنی خوشی کا اظہار کرتے ہوئے وزیراعظم جناب نریندر مودی نے کہا کہ اس طرح کی بات چیت سے اسکیم کے متعدد پہلوؤں بشمول اسکیم کے متعلقہ شعبوں میں جہاں اصلاح کی ضرورت ہے ، کو سمجھنے میں مدد ملتی ہے۔ وزیراعظم نے مزید کہا کہ پردھان منتری آواس یوجنا صرف اینٹ اور مورٹار سے متعلق نہیں بلکہ بہتر معیار زندگی اور خواب کو حقیقت بنانے سے متعلق ہے۔
مستفیدین سے خطاب کرتے ہوئے وزیراعظم نے کہا کہ گزشتہ چار برس کے دوران حکومت نے سبھی کیلئے گھر کی فراہمی کو یقینی بنانے کیلئے ایک مشن کے انداز میں طریقہ کار اپنایا ہے ۔ حکومت اس بات کو یقینی بنانے کی سمت میں کام کر رہی ہے کہ سال 2022 تک جب ہندوستان اپنی آزادی کے 75 سال پورا ہونے کا جشن منائے گا ، ہرایک ہندوستانی کے پاس اس کا اپنا گھر ہو۔
پردھان منتری آواس یوجنا کے تحت حکومت دیہی علاقوں یں تین کروڑ گھر اور شہری علاقوں میں ایک کروڑ گھر تعمیر کرنے کا منصوبہ بنا رہی ہے ۔ حکومت نے اب تک شہری علاقوں میں 47 لاکھ سے زائد گھروں کی تعمیر کو منظوری دے چکی ہے ۔ یہ تعداد سابقہ حکومت کے ذریعہ پچھلے دس سال کے دوران دی گئی منظوری سے چار گنا زیادہ ہے ۔ اسی طرح سے گزشتہ چار برس کے دوران حکومت کے ذریعہ ملک کے دیہی علاقوں می ایک کروڑ سے زائد گھروں کی تعمیر کی منظوری دی جا چکی ہے جبکہ سابقہ حکومت کے ذریعہ 25 لاکھ گھر تعمیر کرنے کو منظوری دی گئی تھی ۔ حکومت گھر کی تعمیر میں لگنے والے وقت میں بھی کمی لانے میں کامیاب ہوئی ہے۔ پہلے گھر کی تعمیر میں اٹھارہ مہینے کا وقت لگتا تھا اب اس میں کمی لاکر 12 مہینے میں گھر کی تعمیر ہو رہی ہے ۔ اس طرح سے تقریباً 6 مہینے کا وقت بچ گیا ۔ موجودہ سرکار کے ذریعہ پردھان منتری آواس یوجنا میں کی گئی تبدیلیوں کا خصوصی ذکر کرتے ہوئے وزیراعظم نے کہا کہ گھر کی سائز کو بھی بڑھا کر 20 مربع میٹر سے 25 مربع میٹر کر دیا گیا ہے ۔ اس طرح اسکیم کے تحت دی جانے والی مالی امداد میں بھی اضافہ کر دیا گیا ہے ۔ پہلے گھر کی تعمیر کیلئے مالی امداد کے طور پر 70 سے 75 ہزار روپے دیئے جاتے تھے ۔ اب اس میں اضافہ کر کے 125000 روپے کر دیا گیا ہے ۔
گفتگو کے دوران وزیراعظم نے کہا کہ پردھان منتری آواس یوجنا ملک کے شہریوں کی عزت سے جڑی ہوئی ہے ۔ یوجنا کا فوکس اس بات کو یقینی بنانا ہے کہ زیادہ سے زیادہ خواتین ، دویانگ بھائی بہنوں کے علاوہ درج فہرست ذاتوں (ایس سی ) ، درج فہرست قبائل(ایس ٹی ) ، دیگر پسماندہ ذاتوں (اوبی سی ) اور اقلیتی فرقوں سے تعلق رکھنے والے افراد کو گھر تک رسائی حاصل ہو ۔
مستفیدین کے ساتھ گفتگو کرتے ہوئے وزیراعظم نے کہا کہ پردھان منتری آواس یوجنا نے سبھی کیلئے روزگار کے مواقع پیدا کئے ہیں ۔ اس اسکیم کو مزید مستحکم کرنے کے مقصد سے سرکار ہنر مندی کو فروغ دینے کیلئے کام کر رہی ہے تاکہ تیزی کے ساتھ معیاری گھروں کی تعمیر کو یقینی بنایا جا سکے ۔ اس کے تحت سرکار نے تقریباً ایک لاکھ راج مستری کو تربیت دینے کا کام شروع کر دیا ہے۔علاوہ ازیں سرکار متعدد ریاستوں میں خواتین راج مستری کو بھی ٹریننگ فراہم کرنے کا کام شروع کر دیا ہے ۔ سرکار کے اس عمل سے یقینی طور پر عورتیں با اختیار ہوں گی۔ وزیراعظم کے ساتھ بات چیت کے دوران پردھان منتری آواس یوجنا کے تمام مستفیدین نے گھر کی ملکیت رکھنے پر اپنی خوشی کا اظہار کیا۔ انہوں نے کہا کہ گھر کا مالک بننا ان کا خواب تھا۔ مستفیدین نے اس بات کی بھی وضاحت کی کہ گھر کے ذریعہ ان کی زندگی اور ان کی زندگی کامعیار کس طرح بدل گیا ہے۔
