نئی دہلی،17؍اپریل،شہری ترقیات اور ہاؤسنگ نیز شہری غریبی کی روک تھام کے وزیر جناب ایم وینکیا نائیڈو کل گوہاٹی میں شمال مشرقی خطے کی 8 ریاستوں میں جدید شہری مشن کی پیش رفت کا جائزہ لیں گے۔ یہ جائزہ میٹنگ کل دن بھر چلے گی۔
شہری ترقیات کی وزارتوں کے سکریٹریز، مرکزی حکومت کے ذریعے شروع کی گئی جدید شہری مشن کے قومی مشن ڈائریکٹرس اور سینئر اہلکار گوہاٹی پہنچ چکے ہیں۔ جہاں وہ آج ریاستی سطح کے مشن کے ڈائریکٹروں اور ریاستوں کے دیگر سینئر اہلکاروں کے ساتھ جائزہ میٹنگ کریں گے۔
وزرائے اعلیٰ اور شہری ترقیات اور میونسپل امور اور ہاؤسنگ کے وزراء کل جائزہ میٹنگ میں جناب ایم وینکیا نائیڈو کے ساتھ ہوں گے۔
پردھان منتری آواس یوجنا (شہری) اٹل مشن فار ری یو وینیشن اینڈ اربن ٹرانسفارمیشن (اے ایم آر یو ٹی) اور اسمارٹ سیٹی مشن جن کا آغاز 25 جون 2015 کو ہو ا تھا اور دو اکتوبر 2014 کو شروع کئے گئے سوچھ بھارت مشن (شہری) کے نفاذ کا آج اور کل ہونے والی جائزہ میٹنگوں میں جائزہ لیا جائے گا۔ ان میٹنگوں میں شمال مشرق اور شمال مشرقی خطے کی شہری ترقیات سے متعلق پروگراموں کا بھی جائزہ لیا جائے گا۔
ہاؤسنگ اور شہری غریبی کی روک تھام کی وزارت (ایچ یو پی اے) کے تحت چلنے والے پروگرام پی ایم اے وائی (شہری) کے مطابق گزشتہ دو برسوں کے دوران شمال مشرق کی 8 ریاستوں میں شہری غریبوں کیلئے 99ہزار 940 سستے مکانات کی تعمیر کو منظوردی گئی ہے۔ جبکہ جے این این یو آر ایم اور راجیو آواس یوجنا کے تحت 2004 سے 2014 کے درمیان 10 برسوں کے دوران 31 ہزار 778 ایسے مکانوں کی تعمیر کو منظوری دی گئی تھی۔ 2004 سے 2014 کے دوران جتنے مکانوں کی تعمیر کو منظوری دی گئی تھی ان میں سے محض 20 ہزار 991 مکانات ہی تعمیر کئے جاسکے۔
شمال مشرقی ریاستوں میں منظور کئے گئے سستے مکانات کی تفصیل:
| ریاست | جے این این یو آر ایم کے تحت منظور کئے گئے مکانوں کی تعداد | آر اے وائی کے تحت منظور کئے گئے مکانوں کی تعداد | پی ایم اے وائی (شہری) کے تحت 2015 سے منظور کئے گئے مکانوں کی تعداد |
| اروناچل پردیش | 1172 | 1536 | 70 |
| آسام | 6583 | – | 24353 |
| منی پور | 4079 | – | 9748 |
| میگھالیہ | 1232 | – | 48 |
| میزورم | 3046 | 142 | 10314 |
| ناگالینڈ | 6265 | 1054 | 12506 |
| سکم | 193 | – | 1 |
| تریپورہ | 3371 | 3005 | 42900 |
| میزان | 26041 | 5737 | 99940 |
پی ایم اے وائی (شہری) کے تحت مرکزی حکومت ہر استفادہ کنندہ کو ایک لاکھ سے لیکر 2 لاکھ 40 ہزار تک کی رقم بطور امداد دستیاب کراتی ہے۔
شمال مشرقی ریاستوں کے 12 قصبوں کو اے ایم آر یو ٹی مشن میں شامل کیا گیا ہے تاکہ سبھی شہری کنبوں کو نل کا پانی دستیاب کرایا جاسکے۔ اس کے علاوہ پانی کی سپلائی کی صورت حال کو بہتر بناکر فی کس یومیہ 135 لیٹر پانی دستیاب کرایا جاسکے، سیور نظام اور نالیوں کے نیٹ ورک کو وسعت دی جاسکے۔ بغیر موٹر والے نقل وحمل کے وسائل کو فروغ دیا جاسکے اور مشن سے وابستہ شہروں میں کھلی جگہوں کا ڈیولپمنٹ کیا جاسکے۔
اے ایم آر یو ٹی کے تحت شمال مشرق کے جن قصبوں ؍شہروں کو شامل کیا گیا ہے ان کی تفصیل حسب ذیل ہے۔
اروناچل پردیش: ایٹا نگر
آسام: گوہاٹی، ڈبرو گڑھ، نوگاؤں اور سلچر
منی پور: امپھال
میگھالیہ: شیلانگ
میزورم: آئزول
ناگالینڈ: دیماپور اور کوہیما
سکم: گینگ ٹاک
تریپورہ: اگرتلہ
اے ایم آر یو ٹی کے تحت شہری ترقیات کی وزارت شمال مشرقی ریاستوں میں پروجیکٹوں کی کل لاگت کا 90 فیصد بطور تعاون کراتی ہے جبکہ دیگر ریاستوں میں یہ شرح ایک تہائی سے لے کر نصف تک ہے۔
شمال مشرق کے 8 قصبوں؍ شہروں کو اسمارٹ سٹی مشن کے تحت شامل کیا گیا ہے۔ ان میں سے پانچ شہروں یعنی گوہاٹی، امپھال، اگرتلہ، کوہیما اور نامچی (سکم )کا انتخاب مالی امداد دستیاب کرانے کیلئے مسابقت کے ذریعے عمل میں آیا ہے۔ پاسی گھاٹ (اروناچل پردیش) شیلانگ اور میزورم اسمارٹ سٹی مسابقے کے تیسرے مرحلے میں حصہ لے رہے ہیں۔
شہری ترقیات کی وزارت ہر اسمارٹ سٹی کو پانچ سال کی مدت کے دوران پانچ سو کروڑ روپے کی امداد ستیاب کراتی ہے۔
