نئی دہلی۔ وزیر اعظم جناب نریندر مودی نے حکومت ہند کے مختلف محکموں اور وزارتوں میں مصروف کار ڈائرکٹروں اور ڈپٹی سکریٹری حضرات سے چار گروپوں میں ملاقات کی۔ اکتوبر 2017 کے دوران مختلف ایام میں یہ ملاقاتیں کی گئیں۔ اس سلسلے کی آخری ملاقات 17 اکتوبر 2017 کو ہوئی۔ ان مذاکرات کا ہر دور تقریباً دو گھنٹے جاری رہا۔
ان ملاقاتوں کے دوران حکمرانی، بدعنوانی، سرکاری کاروباری ادارے، گورنمنٹ ای- مارکیٹ پلیس، صحت، تعلیم، ہنرمندی کے فروغ، زراعت، ٹرانسپورٹیشن، قومی یکجہتی، آبی وسائل، سوچھ بھارت، ثقافت، مواصلات اور سیاحت جیسے موضوعات پر گفتگو اور تبادلہ خیال کیا گیا۔ اس موقع پر وزیراعظم نے ان افسران سے زور دے کر کہا کہ 2022 تک نئے ہندوستان کی تعمیر کے لیے پوری لگن اور نیک نیتی کے ساتھ کام کیا جائے۔ انھوں نے کہا کہ فرسودہ اور بندھے ٹکے طریقے حکومت ہند کی کارکردگی میں زبردست دشواریاں پیدا کرتے ہیں۔ جناب نریندر مودی نے ان افسران سے زور دے کر کہا کہ ان فرسودہ طریقوں کو خارج کرنے کے لیے جدت طراز طریقوں سے کام کیا جائے۔ تاکہ سرکاری کام کاج میں تیز رفتاری پیدا ہوسکے۔ انھوں نے کہا کہ ڈائرکٹر اور ڈپٹی سکریٹریوں کی سطح پر مصروف کار افسران کو بہتر نتائج کے لیے اپنی اپنی ٹیمیں تشکیل دینی چاہئیں ۔
اس موقع پر وزیر اعظم کے دفتر میں وزیر مملکت ڈاکٹر جتیندر سنگھ، وزیر اعظم کے دفتر کے سینئر افسران اور کابینی سکریٹریٹ کے سینئر افسران موجود تھے۔
